د (عدې) کیسې ولې خوند راکړ؟
19.05.2011
يو
وخت مې له استاد شپون سره مرکه درلوده ، ورڅخه ومې پوښتل چې کومه کيسه
خوند ورکوي ، راته کړه يې چې کيسه هغه خوند کوي چې مزه وکړي . استاد له
خندا شين شو . مرکه مو پر هغې خندا بشپړه شوه ، وروسته يې څو وارې راياده
هم کړه .
د
راته گرانې خور فريبا ظاهر لنډه کيسه " عده " مې چې ولوسته خوند يې راکړ .
راسره ومې ويل ولې ؟ دا لنډکۍ کيسه به ولولو ، بيا به يې د "مزې" پر
دلايلو تم شم .
عده
"ماپښین قضا و . مچان بنگيدل. پیلبو په زانګو کې پر ویده ماشوم مخ پټی راکش کړ . د خټیني خوني په کړکۍ کې یې ټول کړي اغزي یو پر بل سربیره کیښودل . څو کټوریه اوبه ېې پر وپاشلې . زړه یې د ماشوم له ګرمۍ بیغمه سو . د کراستي ملا بند یې راواخیست له دروازې ووتله .
نارینه له جومات څخه راوتلي سيوري ته ناست ول . پیلبو پلو پر مخ راکش کړ په چټکو ګامونو تیره سوه . د نارینه وو پس پس یې تر غوږ سو. سریې پر ونه ګرځاوه.
تر مازدیګره یې یوه پلنډه اغزي راټول کړل . د نورو په راټولولو وه چې شیدې یې راویښې سوې . له راولاړیدو سره یې پر ملا لاسونه ونیول ، څو شیبې یې سترګي پټي ونیولې . د تندي خوله یې وچه کړه . پلنډه یې پر سر کیښوده د پلاوه پیڅکی یې په غاښو ټینک ونیو پاته نور اغزي یې په لاس کې راواخستل.
له جومات څخه د تیریدو ویره یې په زړه کې وه خو بله لاره یې نه درلوده . د مازدیګر لمنځونه سوي وه . نارینه راوتلي وو ، د ويالې په غاړه ناست و . ښځي ګامونه چټک کړه . یو چا تر شا ور ژغ کړه:
- لا حول والله د عدې پوره کیدو ته هم نه ګوري
بل یوه ورغبرګه کړه :
- مقصد به لري .
پېلبو څوګامه لیري سوې وه . دریم کس ستونی تازه کړ ، آواز یې لوړ کړ :
- که مقصد لري ږغ دې وکي .
پېلبو نوره لیري سوې وه څه یې نه اوریدل . کورته ننوتله . پلنډه یې کښته کړه . په اغزو ویني سوي لاسونه يې پریوله . د ويالې اوبه سرې وزمه سوې.
د مى ١٧ مه ٢٠١١ کال
د ثور ٢٧ مه ١٣٩٠
پاى"
په
دې کيسه کې نژدې هره جمله تر ظاهرې مانا ورها خوا هم څه لري . اضافي جمله
يا خبره پکې نشته . استاد منلي يو وخت د ځينو پښتو کيسو په باب راته ويل
چې ليکوال دې له غوږه ونيسي ، کور په کور دې وگرځوي او بيا درته ووايي چې
سم دې واوريدل که يه ؟ د استاد مطلب دا و چې اضافي خبرې ، پر لوستونکي د
ماشوم گومان کول او د خپل منطق د منلو لپاره سپينه مامدينه خبره د ځينو
ليکوالانو د ليکنې عيب دى . د فرېبا جانې په " عده " کې دا خو نشته .
لوستونکي ته یې فرصت ورکړی دی چې خپله فکر وکړي.
د
کيسې لومړۍ جمله " ماپښين قضا و" زما په گومان تر ظاهري مانا ورهاخوا د
کيسې له ټول حالت سره ډير مناسبت لري. د گرمۍ په ورځو شپو کې ماپښين قضا
مهال د لټۍ ، سستۍ او زړۀ تنگۍ وخت وي . داستان د لټانو ، زړۀ تنگو او
سستو خلکو تصوير راکوي . همدا مهال د دې کيسې لپاره خورا مناسب او ماهرانه
غوره شوى دى . د کيسې دويمه جمله : " مچان بنگيدل " خپل کمال لري. مچان
ماشوم په عذابوي ، ماشوم ترې ځان نه شي ساتلى مور يې مخ پټى پرې اچوي . دا
هغه حالت دى چې د ماشوم مور ورسره وروسته مخامخ ده . هلته سړي دي چې پس پس
يې جوړ دى او پېلبو ترې په پړوني مخ پټوي . دلته مچ بنگيږي هلته سړي بنگيږي
، دغه ډول سړي د ليکوالې په فکر مچان دي . پېلبو د خپل ماشوم په څير دا
توان نه لري چې دغه مچان له ځانه وشړي ، مخ ترې پټوي .
د
خټينې خونې په کړکۍ کې ازغي سره ټولول او پر سر يې اوبه پاشل چې ماشوم ته
هوا سړه کړي، شايد تر ظاهري مانا ور هاخوا هم څه ولري . ليکوالې چې کومه
ټولنه راته انځور کړې په هغې کې ښځه او ماشوم په يوۀ دريځ کې دي . د ټولنې
فشار ، خبرې او پېغورونه ازغي دي . خټينه خونه ښځه ده ، طبيعي ده ، پاکه ده
، مصنوعي شيان پکې نه دي گډ ، کړکۍ يې دباندينۍ نړۍ ده چې له ازغو ورته
ډکه ده .
ملا
تړل او له کوره وتل ، ښايي په دې مانا وي چې دغه ډول نړۍ ته وتل عزم غواړي
، جلا هوډ ورته پکار دى . د جومات سیوري ته ناست او بيا د پېلبو په ليدو
په پس پسي بوخت سړي ، ماته لا بل تصوير راکوي . له جوماته راوتل ښايي په دې
مانا وي چې د خداى له کوره نور ليرې شوي او د خداى له لارې ليرې شوي دی.
سيورى د رڼا ضد ، د جهالت په مانا ، په بله ژبه ليکواله دغه کسان د خداى
له لارې ليرې وگړي بولي چې نور يې رڼا ته شا ده ، سوکالي په تياره کې ويني.
د کيسې وروستۍ جمله " د ويالې اوبه سرې وزمه سوې."
لوستونکى له شلو فکرونو او پوښتنو سره پريږدي . د ښځې وينه سره نه ده ،
سره وزمه ده ؟ هغې ويالې ته ورځي چې لټان پرې بنډار کوي ؟ او يا ښايي بل څه
وي . همدا خبرې لوستونکى هڅوي چې فکر پرې وکړي . ماته هغه کيسه خوند راکوي
چې فکر پارونکې وي ښايي همدا حالت به هغه مزه وي چې استاد شپون کلونه
وړاندې يادوله.
No comments:
Post a Comment